پکڑا گیا بندہ اکیلا نہیں ہے اس کے ساتھ اور لوگ بھی ہیں

لاہور: چیئرمین تحریک انصاف نے کہا ہے وزیرآباد میں3 لوگوں نےمجھے مارنے کاپلان بنایا، عمران خان کا کہنا ہے پکڑا گیا بندہ اکیلا نہیں ہے اس کے ساتھ اور لوگ بھی ہیں جو پلان میں ملوث ہیں۔

لانگ مارچ میں زخمی ہونے والے سابق وزیراعظم عمران خان نے شوکت خانم اسپتال سے عوام سے خطاب میں انہوں نے کہا کہ اعظم سواتی اور شہباز گل پر جو تشدد ہوا ہے اس کی شفاف تحقیقات ہونی چاہیے۔

اپنے زخمی ہونے کے حوالے سے عمران خان کا کہنا تھا کہ مجھے چار گولیاں لگی ہیں، میں ٹھیک ہونے پر پھر اسلام آباد کی کال دوں گا، جب تک تین لوگ استعفیٰ نہیں دیتے عوام ملک بھر میں احتجاج جاری رکھیں۔

عمران خان کا موقف تھا کہ جب تک یہ تین لوگ استعفی نہیں دیں گے تب تک مجھ پرقاتلانہ حملے کی ٹھیک تفتیش نہیں ہو سکتی۔ اللّٰہ نے مجھے نئی زندگی اور نیا عزم دیا ہے کہ میں آپ کی خدمت کروں۔

عمران خان نے کہا کہ جو حملہ کیا گیا اس کی تفصیلات بعد میں بتاؤں گا، ان لوگوں نے وزیرآباد یا گجرات میں مجھے مارنے کا پلان کیا ہوا تھا، 4 لوگوں نے بند کمرے میں مجھے مروانے کا فیصلہ کیا۔

کہا میں نے ویڈیو بنائی ہوئی ہے جس میں بتا دیا ہے کہ وہ لوگ کون ہیں؟، میں نے ان کا پلان 24 ستمبر کو جلسے میں رکھا تھا، مجھے اندر سے لوگوں نے بتایا مجھے مارنے کا پلان بنایا گیا ہے۔

عمران خان نے کہا کہ مریم نواز کی طرف سے نوازشریف کے ساتھ لیو پلیئنگ فیلڈ کی بات کا جواب دیتے ہوئےکہا کہ میرا اس شخص سے موازنہ بنتا ہی نہیں ہے وہ چوری کرکے بھاگا ہوا میں مشکل حالات میں بھی عوام کے درمیان ہوں۔

پی ٹی آئی چیئرمین نے کہا کہ مجھے انفارمیشن اس لیے ملتی ہے کہ میں حکومت میں رہا ہوں اور اداروں میں لوگوں سے میرے تعلقات ہیں، لوگ مجھے بتاتے ہیں کہ کیا سازش ہو رہی ہے؟ انہوں نے فیصلہ کیا کہ سلمان تاثیر جیسا کوئی کیس بنایا جائے۔

پی ٹی آئی چیئرمین نے اس دوران زیادہ تر وہی باتیں کیں جو کہ وہ رجیم چینج کے حوالے سے گزشتہ کئی مہینوں سے کہتے آرہے ہیں انھوں نے ایک بار پھر وہی پرانی باتیں دہرائیں۔

عمران خان نے کہا کہ قوم نے فیصلہ کیا کہ جو لوگ 30 سال سے ملک کو لوٹ رہے ہیں ان کا ساتھ نہیں دینا، حکومت سے نکالنے کے بعد جس طرح قوم نے میری پذیرائی کی میں تو خود حیران رہ گیا۔

سابق وزیراعظم نے کہا کہ یہ لوگ سمجھ رہے تھے کہ پی ٹی آئی ختم ہو جائے گی، 17 جولائی کے ضمنی الیکشن میں تمام تر دھاندلی کے باوجود پی ٹی آئی کامیاب ہوئی۔

سابق وزیراعظم نے کہا کہ توشہ خانہ کا سارا ریکارڈ موجود ہے لیکن مجھے نا اہل کر دیا گیا، آج تک انہوں نے ایک کاغذ نہیں دکھایا کہ انہوں نے لندن میں 4 فلیٹ کیسے خریدے؟

عمران خان نے ایک بار پھر چیف الیکشن کمشنر پر الزام لگایا اور کہا وہ تو نواز شریف کے گھر کے نوکروں کی طرح ہے، فارن فنڈنگ کیس میں لوگوں کو بلا وجہ ہراساں کیا جا رہا ہے۔

انھوں نے کہا کہ ایف آئی اے لوگوں کو اس لیے ہراساں کر رہا ہے تاکہ ہمارے ڈونرز بھاگ جائیں،ان کا کہنا تھا کہ ہم عدالت میں گئے، عدالت نے 8 مرتبہ الیکشن کمیشن کا فیصلہ ریورس کیا، وہ پارٹی جو پبلک سے پیسہ اکٹھا کرتی ہے اسے بند کرنے کی کوشش کر رہے ہیں۔

پی ٹی آئی چیئرمین نے کہا کہ سب کو پتہ ہے کہ ارشد شریف کے پیچھے کون پڑا ہوا تھا، عوام بے وقوف نہیں ہیں، لوگوں کو سب پتہ ہے کہ کیا ہو رہا ہے؟مجھ پر کیسز بنوا کر اور کیچڑ اچھال کر بدنام کیا جا رہا ہے۔