عمران خان کے گرد سازشی کیڑے پھر رہے ہیں میں نہ وعدہ خلاف گواہ بنا تھا نہ کبھی بنوں گا،فیصل واوڈا

فائل:فوٹو

اسلام آباد: پاکستان تحریک انصاف کے سابق رہنماء فیصل واوڈا نے کہا ہے کہ میرا اور شہزاد اکبر کا جھگڑا ہوا تھا۔ میں نے عمران خان کو شہزاد اکبر کے بارے میں کہا تھا کہ یہ باہر چلا جائے گا۔ عمران خان کے گرد سازشی کیڑے پھر رہے ہیں۔ میں نہ وعدہ خلاف گواہ بنا تھا نہ کبھی بنوں گا

اختیارات کے ناجائز استعمال اور برطانیہ سے فنڈز خورد برد کے معاملے پر نیب کی تحقیقاتی ٹیم کے سامنے پیشی کے بعد میڈیا سے بات کرتے ہوئے فیصل واوڈا نے کہا کہ لندن سے فنڈز آئے تھے، اس پر مجھے بلایا گیا۔ اس سارے معاملے پر کابینہ میں، میں نے اور شیریں مزاری نے سوال اٹھائے تھے۔ میرے خیال میں فواد نے بھی سوال کیا تھا۔ اس معاملے پر بیرسٹر شہزاد اکبر نے بریفنگ دی تھی۔

فیصل واوڈا نے کہا کہ ایک ملک کے سر پر رکھ کر یہ سائن کروایا گیا۔ مجھے پوچھیں کہ اعظم خان پیسے کے لین دین میں شامل ہے کہ نہیں۔ یہ غلط کام بلاوجہ کابینہ سے کروایا گیا تھا۔ میرا اور شہزاد اکبر کا جھگڑا ہوا تھا۔ پاکستان کے خزانے کو 190 ملین پاوٴنڈز کا نقصان ہوا۔ عمران خان کو شہزاد اکبر کے بارے میں کہا تھا کہ یہ باہر چلا جائے گا۔

انہوں نے کہا کہ عمران خان کے گرد سازشی کیڑے پھر رہے ہیں۔ میں نہ وعدہ خلاف گواہ بنا تھا نہ کبھی بنوں گا۔ عمران خان اپنے لوگوں پر بے جا بھروسا کرتے ہیں۔ آئی بی بھی اس وقت وہی رپورٹ کرتی تھی جو شہزاد اکبر کہتے تھے۔ جب ارشد شریف کا قتل ہوا تو جھوٹی کہانی سامنے آئی، میں نے تب بھی کہا تھا کہ یہ پلان کیا گیا ہے، پاکستان میں پلان ہوا۔

انہوں نے کہا کہ عمران خان کو اللہ نے عزت دی ہے۔ عمران خان کے ساتھ لوگوں کی محبت ہے۔ پی ڈی ایم کے ساتھ لوگوں کی نفرت ہے۔ اس مارچ سے کس کو فائدہ پہنچے گا ؟۔ کون یہ مقاصد حاصل کروانا چاہ رہا ہے؟۔

لانگ مارچ پر تنقید کرتے ہوئے فیصل واوڈا کا کہنا تھا کہ جب آپ کی شہرت اتنی ہے کہ آپ دو تہائی اکثریت سے الیکشن جیت جائیں گے تو ایسے میں مارچ کی ضرورت ہے۔ فواد چودھری کو ایک جھوٹ کے پیچھے کئی جھوٹ بولنے کی ضرورت نہیں ہے۔ میرا سیاسی سفر تحریک انصاف کے ساتھ شروع ہوا تھا اور تحریک انصاف کے ساتھ ہی ختم ہو گا۔

انہوں نے مزید کہا کہ میں نے اپنی وفا داری ثابت کر دی ہے۔ عمران خان جب بھی مجھ سے سوال کرنا چاہیں گے میں موجود ہوں۔ خان صاحب کاروباری آدمی ہیں نہیں۔ عمران خان سے پیار کا رشتہ تھا اور رہے گا۔

فیصل واوڈا نے کہا کہ جنرل فیصل ایک غیرت مند افسر ہے۔ میں نے عمران خان کو براہ راست معاملات ڈیل کرنے کا کہا۔ میں نے عمران خان سے کہا کہ جنرل فیصل سے ملاقات کروا دیتا ہوں۔ جنرل فیصل نے کہا کہ میرے باس ملک میں نہیں، ان کی اجازت کے بعد عمران خان سے ملاقات کروں گا۔ جب میں نے عمران خان کو یہ بات بتائی تو دو خاص لوگوں نے میرے خلاف پروپیگنڈا کیا۔

دوسری جانب نیب کی تحقیقاتی ٹیم نے فیصل واوڈا کو تحریری جوابات کے لیے سوال نامہ دیا اور تحریری جواب مانگ لیے۔ اس سلسلے میں فیصل واوڈا کو جوابات جمع کروانے کے لیے کچھ دن کی مہلت بھی دے دی گئی۔ نیب کی تحقیقاتی ٹیم نے فیصل واوڈا کا بیان بھی ریکارڈ کیا۔