رانا ثنااللہ کی باتیں سنجیدہ نہیں لیتا، اسمبلیاں اسی ماہ توڑ دوں گا ،عمران خان

فوٹو : فائل

اسلام آباد: چیئرمین تحریک انصاف کہتے ہیں میں رانا ثنااللہ کی باتیں سنجیدہ نہیں لیتا، اسمبلیاں اسی ماہ توڑ دوں گا ،عمران خان کا کہنا تھا کہ انتظار صرف رواں ماہ تک ہے۔

نجی ٹی وی چینل سے گفتگو کرتے ہوئے عمران خان نے کہا پرویزالہی اپنے حساب سے ٹھیک کہتے ہیں مگر میں سمجھتا ہوں ہم دسمبر سے آگے نہیں جائیں گے۔

سابق وزیراعظم نے کہا وزیراعلیٰ پنجاب کے موقف میں کوئی ابہام نہیں ہے پرویز الہٰی کہہ چکے ہیں حکومت ختم کرنے کے حوالے سے جیسا میں کہوں گا، وہ ویسا ہی کریں گے۔

چیئرمین تحریک انصاف نے کہا کہ موجودہ صورتحال میں پرویز الہٰی نے دوبارہ وزیراعلیٰ بنانے کا کوئی مطالبہ نہیں رکھا ہے۔

انھوں نے ایک بار پھر کہا جنرل (ر) باجوہ حکومت کے دوران مجھ سے وزیر اعلیٰ پنجاب عثمان بزدار کو ہٹانے اور علیم خان کو چیف منسٹر بنانے کا کہتے تھے۔

عمران خان نے کہا علیم خان پر الزامات تھے اس لئے انھیں وزیراعلیٰ نہیں بنایا، پرویز الہی نے بھی علیم خان کو سپورٹ کرنے سے انکار کیا، جنرل باجوہ کا مطالبہ عجیب تھا۔

انہوں نے کہا کہ ہمارے ساتھ جو یہ 7 ماہ میں ہوا، اس میں جنرل (ر) باجوہ کی پالیسیاں رہیں، وہ آئندہ انتخابات کے حوالے سے اندازے لگاتے تھے۔

چیئرمین تحریک انصاف نے کہا کہ جو لوگ حکومت تبدیل کرنے میں ملوث تھے وہ سب میر جعفر اور میر صادق ہیں، ہماری جب حکومت گئی تو سب نے سوچا اب لوگ مٹھائیاں بانٹیں گے۔

ان کا کہنا تھا کہ انہوں نے سوچا کہ حکومت ختم ہونے کے بعد میری سیاست ختم ہوگئی، وفاقی وزیر داخلہ رانا ثناء اللّٰہ سے متعلق سوال پر کہا میں ان کی باتوں کو کبھی بھی سنجیدہ نہیں لیا نہ لیتا ہوں۔