اسلام آباد: نوازشریف کی سزا بھی ختم کرانے کےلئے ہائیکورٹ جانے کا فیصلہ کر لیا گیا ، وزیراعظم میاں شہباز شریف کی زیر صدارت مسلم لیگ ن کے اعلیٰ سطح اجلاس کی اندرونی کہانی سامنے آگئی۔
ذرائع کا کہنا ہے سزا ہائی کورٹ میں چیلنج کی جائے گی اور سزا کالعدم کرانے کےلئے مریم نواز اور کیپٹن (ر) صفدر کے کیسز کے فیصلوں کواسلام آباد ہائیکورٹ میں بنیاد بنایا جائے گا۔
مسلم لیگ ن کے قائد نوازشریف کی سزا ختم کرانے سے متعلق آپشن پر قانونی ماہرین نے اپنی رائے بھی دے دی۔
شہباز شریف کی زیر صدارت اجلاس میں فیصلہ کیا گیا ہے کہ نواز شریف کی سزا کالعدم کرانے کے لئےاسلام آباد ہائیکورٹ میں فیصلہ فوری چیلنج کیا جائے گا۔
ذرائع کا کہنا ہے کہ اجلاس میں یہ بھی فیصلہ کیاگیا کہ نوازشریف کی وطن واپسی کی تاریخ کا تعین لندن میں کیا جائے گا۔
اجلاس میں ن لیگ کی جانب سے رابطہ عوام مہم کے سلسلے میں پنجاب کے 9 ڈویژن میں جلسے رکھے جائیں گے، مریم نواز کی وطن واپسی کا بھی قوی امکان ہے۔
ذرائع کے مطابق ن لیگ کا رواں ماہ پارٹی انتخابات کرانے کا بھی فیصلہ کیا گیا جبکہ پارٹی قیادت کے حوالے سے بھی اہم فیصلے لیے جانے کا امکان ہے۔
تبصرے بند ہیں.