لاہور: چیئرمین تحریک انصاف عمران خان آج
صوبائی اسمبلیاں توڑنے کی حتمی تاریخ دیں گے، وہ پہلے ہی پنجاب اور خیبر پختوانخواہ اسمبلیاں تحلیل کرنے کا اعلان کرچکے ہیں.
پاکستان تحریک انصاف کا آج لبرٹی چوک میں عوامی اجتماع شیڈول ہے جس سے عمران خان خطاب میں بے بس اسمبلیوں کی بجائے پاکستان کے عوام پر اعتماد کا اظہار کریں گے.
گزشتہ روز صحافیوں سے ملاقات میں عمران خان کا کہنا تھا کہ جو لوگ کہہ رہے ہیں کہ اسمبلیاں تحلیل نہیں ہونگی وہ آج میری تقریر کا انتظار کریں، اسمبلی تحلیل کے فیصلے پر پرویزالٰہی کی تائید بھی حاصل ہوگی۔
عمران خان نے کہا ‘ پرویزالٰہی کے ساتھ مکمل رابطے میں ہوں‘ وزیراعلیٰ پنجاب کے پاس وزیراعظم سے زیادہ اختیارات ہیں‘ پرویزالٰہی چاہتے ہیں اسمبلیاں کچھ دیر اور چلیں مگر چوہدری صاحب وہ کریں گے جس کا ہم انہیں کہیں گے۔
انہوں نے بڑے یقین کے ساتھ دعویٰ کیا کہ پی ٹی آئی اور ق لیگ میں کوئی اختلاف نہیں ہم جو فیصلہ کریں گے ق لیگ ہمارے ساتھ ہوگی۔
عمران خان کا کہنا تھا کہ معاشی تباہی سے بچنے کا واحد راستہ عام انتخابات ہیں‘ دسمبر کے مہینے میں ہی اسمبلیاں تحلیل ہو جائیں گی۔
انہوں نے کہا کہ مسلم لیگ ق مستقبل میں بھی ہماری اتحادی رہے گی خواہش ہے کہ آئندہ حکومت مضبوط ہو اتحادی حکومت مسائل کا حل نہیں ہے.
سابق وزیراعظم نے کہا کہ ملک کی معاشی صورتحال عوام کے سامنے ہے ملک ہر گزرتے دن کے ساتھ نیچے جا رہا ہے اور امپورٹڈ حکمران اپنا آخری موقع سمجھ کر ملکی نقصان کے باوجود احساس نہیں کر رہے.
تبصرے بند ہیں.