اسلام آباد: کس صدر، کس وزیراعظم نے کتنے تحائف لئے؟ ہائیکورٹ نے مکمل تفصیلات مانگ لیں، اسلام آباد ہائی کورٹ کا قیام پاکستان سے اب تک کابینہ ڈویژن کو ریکارڈ پیش کرنے کا حکم۔
اسلام آباد ہائی کورٹ کے جسٹس میاں گل حسن اورنگزیب کی عدالت نے قیام پاکستان سے اب تک صدور اور وزرائے اعظم کو ملنے والے تحائف کی تفصیل فراہم کرنے سے متعلق درخواست میں پاکستان انفارمیشن کمیشن کے فیصلے پر عمل درآمد نہ کرنے پر کابینہ ڈویژن کو نوٹس میں ایک ماہ میں رپورٹ طلب کر لی۔
عدالت میں سماعت کے دوران ڈپٹی اٹارنی جنرل سید احسن رضا شاہ نے کہاکہ میرے خیال سے 1990 سے پہلے کا تو ریکارڈ ہی دستیاب نہیں ہو گا، ایسی معلومات تو ویب سائٹ پر ہونی چاہئیں۔
عدالت نے کہاکہ ہو سکتا ہے کہ توشہ خانہ کا ریکارڈ دستیاب ہو، ریکارڈ ملے تو دے دیں، وکیل نے کہاکہ پٹیشنر نے 1947 سے لے کر اب تک کے صدور اور وزرائے اعظم کو ملنے والے تحائف کی تفصیل طلب کی ہیں.
درخواست گزار کے وکیل نے کہاکہ پاکستان انفارمیشن کمیشن نے 29 جون کو آرڈر دیا مگر 5 ماہ کا وقت گزرنے کے باوجود اس پر بھی عمل نہیں ہوا، عدالت نے کہا کہ باقی پبلک سرونٹس کو بھی اس میں شامل کیوں نہیں کیا؟
جسٹس میاں گل حسن اورنگزیب نے کہاکہ آپ اپنے آپ کو صدر اور وزیراعظم کی حد تک محدود کیوں کر رہے ہیں؟ اس سے آپ کے عزائم کا پتہ چل رہا ہے، جو بھی پٹیشن آتی ہے وہ وزیر اعظم سے متعلق آتی ہے.
عدالت نے قیام پاکستان سے اب تک صدور اور وزرائے اعظم کو ملنے والے تحائف کی تفصیل فراہم کرنے سے متعلق درخواست میں پاکستان انفارمیشن کمیشن کے فیصلے پر عمل درآمد نہ کرنے پر کابینہ ڈویژن کو نوٹس جاری کرتے ہوئے ایک ماہ میں رپورٹ طلب کرتے ہوئے سماعت ملتوی کردی.
تبصرے بند ہیں.