فوٹو : عمران خان انسٹاگرام
اسلام آباد: سابق وزیراعظم عمران خان نے کہا ہے سال 2022 بیک وقت بدترین وبہترین رہا، بہترین یوں کہ اہل پاکستان کو ایک قوم بنتے دیکھا، عمران خان کا کہنا ہے کہ پاکستان کو مجرموں کے ایک گروہ کے حوالےکر دیا گیا۔
سال نو کے موقع پر جاری پیغام میں چیئرمین پی ٹی آئی عمران خان نے کہا کہ سال 2022 میں بہترین کارکردگی والی حکومت کو سازش کے تحت ہٹا کر ملک کو مجرموں کے حوالے کیا گیا.
انھوں نے کہا کہ موجودہ مایوس کن صورتِ حال کے باوجود پُرامید ہیں کہ 2023 کا الیکشن پی ٹی آئی ہی جیتے گی، نئے سال کے آغاز کے موقع پر چیئرمین پی ٹی آئی نے اپنی تصویر جاری کرتے ہوئے ایک پوسٹ درج کی.
عمران خان نے لکھا ہے سال 2022 بیک وقت بہترین اور بدترین تھا“ ذاتی مفاد میں گُندھی ایک سازش کے ذریعے بہترین معاشی کارکردگی دکھانے والی حکومت کو ہٹایا گیا اور پاکستان کو مجرموں کے ایک گروہ کے حوالےکر دیا گیا‘۔
چئیرمین پاکستان تحریک انصاف نے کہا کہ اس گروہ نے معیشت زمیں بوس کی، خود کو این آر او ٹو دیا اور نیب قانون میں ترامیم کے ذریعے تمام وائٹ کالر کرمنلز کیلئے لوٹ مار کے دروازے کھول دیے۔
گزشتہ سال کے حوالے سے چیئرمین پی ٹی آئی نے لکھا کہ یہ سال بہترین یوں تھا کہ اسی دوران میں نے اہلِ پاکستان کو ایک قوم کےسانچےمیں ڈھلتے دیکھا، الیکشن کمیشن اور مقتدرہ کی مکمل پشت پناہی سے ملک کی تمام سیاسی جماعتیں یکجا تھیں.
سب تحریک انصاف کیخلاف صف آرا ہونے کے باوجود تحریک انصاف غیر معمولی عوامی تائید و حمایت سے 75فیصد ضمنی انتخابات میں فتحیاب رہی اور اس نےخود کوصحیح معنوں میں ایک قومی جماعت کےطور پر منظم کیا۔
انھوں نے عزم کا اظہار کیا کہ آج کل قومی منظر نامے پر، خصوصاً دیوالیہ پن کے امکانات کے باعث چھائی مایوسی کے باوجود میرا رب العزت پر ایمان اور اپنی قوم پر اعتماد ہے کہ تحریک انصاف بلاشبہ 2023 میں انتخاب کے ذریعے ایک مضبوط حکومت قائم کرے گی.
سابق وزیراعظم نے کہا پاکستان کو بحرانوں کی اس دلدل، جس میں امپورٹڈ سرکار اور اس کے سرپرستوں نے ملک کو دھکیلا ہے، سے نجات دلوانے کیلئے ٹھوس ڈھانچہ جاتی اصلاحات متعارف کروائے گی.
تبصرے بند ہیں.