پنجاب اسمبلی آج ٹوٹنے کا امکان ہے، خیبرپختونخوا اسمبلی تحلیل کرنے کی سمری بھی تیار

فوٹو: فائل

 لاہور: پنجاب اسمبلی آج ٹوٹنے کا امکان ہے، خیبرپختونخوا اسمبلی تحلیل کرنے کی سمری بھی تیار ہے، پنجاب میں حتمی صورتحال کے فوری بعد وزیر اعلیٰ محمود خان سمری بھجوا دیں گے.

پنجاب اسمبلی کی تحلیل کیلئے وزیراعلیٰ پنجاب چوہدری پرویز الٰہی کی طرف سے بھیجی گئی سمری گورنر پنجاب بلیغ الرحمان کو موصول ہوگئی ہے۔

گورنر پنجاب بلیغ الرحمان نے ٹوئٹر پر اس بات کا اعلان کیا کہ انہیں سمری موصول ہوچکی ہے۔اسمبلی تحلیل کرنے کی سمری مل گئی، فیصلہ بھاری دل سےکروں گا.

نجی ٹی وی سے گفتگو کرتے ہوئے گورنر پنجاب بلیغ الرحمان نے کہا کہ جوبھی فیصلہ کروں گا بھاری دل سےکروں گا، پنجاب اسمبلی عوامی نمائندگان کاہاؤس ہے، اسمبلی کو تحلیل کرنا کوئی آسان فیصلہ نہیں ہوتا۔

گورنرپنجاب نے مزید کہا کہ وزیر اعلیٰ پنجاب کی ایڈوائس پر عمل درآمد کرنا ناخوشگوار لمحہ ہوگا، ذرائع گورنرہاؤس کے مطابق گورنرپنجاب آج وزیراعلیٰ پنجاب کی ایڈوائس پرفیصلہ کریں گے۔

واضح رہے کہ وزیراعلیٰ پنجاب چوہدری پرویز الہٰی نے اسمبلی توڑنے کی سمری پر دستخط کرکے گورنر پنجاب کو ارسال کردی تھی۔

فواد چوہدری کا کہنا تھا کہ وزیراعلیٰ نے کہا تھا کہ پنجاب اسمبلی توڑنے کی سمری پر دستخط کردیے ہیں، پنجاب اسمبلی تحلیل کی ایڈوائس گورنر پنجاب کو بھجوا دی گئی ہے.

گورنر اسمبلی تحلیل نہیں کرتے تو 48 گھنٹے میں اسمبلی خود تحلیل ہوجائے گی، انھوں نے کہا ہم مسلم لیگ ق، پرویز الہٰی اور مونس الہٰی کا شکریہ ادا کرتے ہیں، نگران حکومت کے قیام کے لیے اپوزیشن لیڈر حمزہ شہباز کو خط لکھنے جا رہے ہیں.