فائل:فوٹو
لاہور: پنجاب کے نگراں وزیراعلیٰ کی تقرری کا معاملہ الیکشن کمیشن پہنچ گیا، جس کے لیے خصوصی اجلاس کے بعد حتمی اعلان کل کیا جائے گا۔
ذرائع کے مطابق آرٹیکل 224 اے کے تحت نگراں وزیراعلیٰ کے تقرر کا فیصلہ اب الیکشن کمیشن کرے گا۔ حکومت اور اپوزیشن کے دو، دو نام الیکشن کمیشن کے پاس پہنچ گئے۔
چیف الیکشن کمشنر نے نگراں وزیر اعلیٰ کے تقرر کے لیے اہم اجلاس کل طلب کر لیا ہے، جس کے بعد الیکشن کمیشن پنجاب کے نگراں وزیراعلیٰ کے نام کا اعلان کل کرے گا۔ الیکشن کمیشن کے اجلاس میں نگراں وزیراعلیٰ کے ناموں پر غور کیا جائے گا اور کسی ایک نام پر اتفاق کر کے تقرر کی منظوری دے دی جائے گی۔
اس سے قبل حکومتی اتحاد کی جانب سے احمد نواز سکھیرا اور نوید اکرم چیمہ کے نام تجویز کیے گئے تھے۔ اپوزیشن نے محسن رضا نقوی اور احد چیمہ کو نامزد کررکھا ہے۔
یادرہے کہ الیکشن کمیشن سیکرٹریٹ آج اور کل کھلا رہے گا جب کہ تمام ملازمین کو ہفتہ اور اتوار کے روز دفتر آنے کی ہدایت بھی کی گئی ہے۔
تبصرے بند ہیں.