دبئی: طویل عرصہ تک علیل رہنے کے بعد سابق صدر 79 سالہ جنرل (ر) پرویزمشرف دبئی میں انتقال کرگئے ہیں۔
میڈیا رپورٹس کے مطابق سابق آرمی چیف جنرل (ر) پرویزمشرف کے انتقال کے بعد میت واپسی کے انتظامات کئے جا رہے ہیں ، پرویز مشرف طویل عرصے سے بیمار تھے، طبیعت بگڑنے پر امریکن اسپتال دبئی میں لے جایا گیا۔
پرویز مشرف کے اہلخانہ نے سابق صدر جنرل (ر) پرویزمشرف کے انتقال کی تصدیق کی، اہلخانہ کے مطابق پرویز مشرف کا آج علی الصبح دبئی میں انتقال ہوا۔
سابق صدر پرویز مشرف کی میت پاکستان لانے سے متعلق فوری کنفرم نہیں ہو سکا ہے، پرویز مشرف 11اگست 1943 کو دہلی میں پیدا ہوئے تھے، ان کا انتقال 79 سال کی عمر میں ہوا۔
پرویز مشرف 7 اکتوبر 1998 کو چیف آف آرمی اسٹاف کے عہدے پر فائز ہوئے تھے، 12 اکتوبر 1999 کو وہ سابق وزیراعظم نواز شریف کو ہٹا کر چیف ایگزیکٹو بنے اور بعد ازاں اپریل 2002 میں ریفرنڈم کراکے باقاعدہ صدر پاکستان منتخب ہوئے۔
سال 2004 میں آئین میں 17 ویں ترمیم کے ذریعے مزید 5 سال کے لیے پرویز مشرف باوردی صدر منتخب ہوئے، پرویز مشرف 18 اگست 2008 کو مستعفی ہوکر ملک سے باہر چلےگئے تھے.
عسکری قیادت کا پرویز مشرف کی وفات پر اظہارِ افسوس و تعزیت
سابق صدر و آرمی چیف پرویز مشرف کے انتقال پر عسکری قیادت کا اظہارِ افسوس، جنرل ریٹائرڈ پرویز مشرف کے اہل خانہ سے تعزیت کی ہے.
پاک فوج کے شعبہ تعلقات عامہ کی جانب سے جاری اعلامیہ کے مطابق چیئرمین جوائنٹ چیفس آف اسٹاف کمیٹی نے پرویز مشرف کے انتقال پر اظہار افسوس کیا۔
آئی ایس پی آر کے مطابق تینوں مسلح افواج کے سربراہ نے پرویز مشرف کے ایصال ثواب کے لئے دعا کی کہ اللہ مشرف کو اپنے جوار رحمت میں جگہ عطافرمائے۔
واضح رہے کہ 79 سال کی عمر میں سابق صدر جنرل ریٹائرڈ پرویز مشرف آج (5 فروری) کو دبئی میں طویل علالت کے بعد انتقال کر گئے۔
سابق صدرکی طبعیت رات کو بگڑ گئی تھی جس کے بعد انہیں فوری طور پر امریکن اسپتال لے جایا گیا جہاں وہ 79 برس کی عمر میں فجر کے وقت انتقال کرگئے۔
تبصرے بند ہیں.