پاکستان سپر لیگ کا میلہ آج سے ملتان میں سجے گا، افتتاحی میچ میں لاہور قلندرز اور ملتان سلطانز مدمقابل ہونگے

فائل:فوٹو

ملتان: پاکستان سپر لیگ کا میلہ آج سے ملتان میں سجے گا، افتتاحی میچ میں لاہور قلندرز اور ملتان سلطانز میں زور کا جوڑ پڑے گا۔پی ایس ایل کی افتتاحی تقریب ملتان میں ہو گی، موسیقی کا تڑکا لگے گا، آتش بازی کا بھی شاندار مظاہرہ کیا جائے گا۔

دفاعی چیمپئن لاہور قلندرز ایونٹ کا فاتحانہ آ غاز کرنے کے لیے پر عزم ہے، ملتان سطانز نے بھی جیت پر نظریں جما لی ہیں۔

چوکے پر چوکا، چھکے پر چھکا، اب ہوگا دھوم دھڑکا، کرکٹ شائقین کیلئے انتظار کی گھڑیاں ختم ہو گئیں، پاکستان سپر لیگ کا میلہ سجنے کو تیار ہے، 6 ٹیمیں چمچماتی ٹرافی کے لیے آج سے جان لڑائیں گی ،لاہور قلندرز اعزاز کا دفاع کریں گے، میچ رات ساڑھے 7 بجے شروع ہو گا۔

پاکستان سپر لیگ کی افتتاحی تقریب ملتان میں ہو گی، موسیقی کا تڑکا لگے گا، آتش بازی کا بھی شاندار مظاہرہ کیا جائے گا۔

افتتاحی میچ سے قبل لاہور قلندرز اور ملتان سلطانز نے ملتان کرکٹ سٹیڈیم میں بھرپور ٹریننگ کی، پریکٹس سیشن میں دونوں ٹیموں کے کوچز کی جانب سے بیٹنگ، باوٴلنگ اور فیلڈنگ کی مختلف تیکنیک اور فٹنس لیول پر توجہ دی گئی۔

محمد رضوان اور حارث روٴف نے بھی سکواڈز کو جوائن کر لیا، قلندرز پہلے ہی میچ میں دھمال ڈالنے کے لیے تیار ہیں، شاہین آفریدی اور حارث روٴف کی نیٹس میں تیز رفتار باوٴلنگ نے مخالفین کے لیے خطرے کی گھنٹی بجا دی ہے۔

خیال رہے کہ لاہور قلندرز اور ملتان سلطانز کی ٹیمیں اب تک 13 مرتبہ آمنے سامنے آچکی ہیں، 7 مرتبہ جیت سلطانز کا مقدر بنی، 6 میچز میں قلندرز نے میدان مارا۔

پی ایس ایل کے آٹھویں سیزن کا لاہور فاتحانہ آغاز کرے گا یا ملتان قلندرز سے پچھلے فائنل کا بدلہ لے گا، تمام لوگوں کی نظریں ملتان کرکٹ سٹیڈیم پر مرکوز ہو گئیں۔

ادھر ملتان سٹیڈیم میں تزئین و آرائش کا کام مکمل کر لیا گیا، سٹینڈز کی صفائی ستھرائی کر لی گئی ہے، پچز بھی تیار ہیں، روایتی طور پر پچ سپن کیلئے سازگار رہنے کا امکان ہے۔

کرکٹ ایونٹ کیلئے سکیورٹی انتظامات کا پلان بھی تیار ہو چکا ہے، قانون نافذ کرنے والے اداروں کے تقریباً 8 ہزار اہلکار مختلف مقامات پر خدمات سرانجام دیں گے۔