فائل:فوٹو
لاہور: پاکستان تحریک انصاف کے مرکزی رہنما ء فوادچوہدری کاکہناہے کہ روزِ اول سے کہہ رہے ہیں کہ نظامِ احتساب کی تباہی این آر او دیکر لائے گئے مجرموں کا کلیدی ہدف ہے، چیئرمین نیب کا استعفیٰ فاشسٹ نظام کے ٹوٹنے کی طرف بڑا قدم ہے۔
پاکستان تحریک انصاف کی جانب سے چیئرمین نیب کے استعفیٰ کا خیرمقدم کیا گیا ہے۔فواد چوہدری نے کہا کہ آفتاب سلطان نے اپنے کام میں “مداخلت” کے خلاف استعفیٰ دیا۔
رہنماء پی ٹی آئی نے کہا کہ چیف الیکشن کمشنر کیلئے چیئرمین نیب کے استعفیٰ میں بڑا پیغام ہے، میں ان 22 افسران کو جن کو پنجاب میں مداخلت کرنے کیلئے لگایا گیا ہے کہتا ہوں وہ بھی خود کو اس نظام سے علیحدہ کریں، یہ ملک اور بیوروکریسی دونوں کے مفاد میں ہے۔
انہوں نے مزید کہا کہ چیئرمین نیب کا استعفیٰ تحریک انصاف کے موٴقف کی واضح توثیق ہے، روزِ اول سے کہہ رہے ہیں کہ نظامِ احتساب کی تباہی این آر او دیکر لائے گئے مجرموں کا کلیدی ہدف ہے، ان مجرموں نے سازش سے اقتدار ملتے ہی سب سے پہلے نیب کو تباہ کیا، اپنے 11 سو ارب کی چوری بچانے کیلئے انہوں نے نیب قانون میں نہایت شرمناک ترامیم کیں۔
فواد چوہدری نے کہا کہ لازم ہے ریاستی ادارے مجرموں کے اشاروں پر کھیلنے کی بجائے آئین و قانون کی بالادستی کی راہ اختیار کریں، کٹھ پتلی راج انشاء اللہ جلد انجام کو پہنچے گا، ریاست اور عوام کو آگے بڑھنا ہے۔
تبصرے بند ہیں.