اسلام آباد:اسرائیلی حملے میں 10 فلسطینی شہید، پاکستان کی شدید مذمت پاکستان کی طرف سے مغربی کنارے کے مقبوضہ فلسطینی علاقے جنین میں اسرائیلی فوج کے چھاپوں اور فضائی حملوں کی شدید مذمت کی گئی ہے ۔
پیر سے شروع ہونے والے اسرائیلی حملوں میں اب تک 10 فلسطینی شہید اور 50 کے قریب زخمی ہوئے ہیں جن میں سے بعض کی حالت تشویشناک بتائی جاتی ہے۔
ترجمان دفتر خارجہ کے مطابق اسرائیلی فوج کی جانب سے فلسطینی عوام کے خلاف پرتشدد کارروائیاں فوری طور پر ختم ہونی چاہیں۔
پاکستان عالمی برادری سے مطالبہ کرتا ہے کہ وہ اسرائیلی قابض افواج کے ان ظالمانہ اور غیر قانونی اقدامات کو رکوائے۔
ترجمان نے کہا کہ فلسطینی عوام کے انسانی حقوق کے تحفظ کو یقینی بنانے کے لیے عالمی برادری اپنی ذمہ داری ادا کرے۔
پاکستان فلسطینی عوام کے حق خودارادیت سمیت ان کے حقوق اور آزادیوں کے مکمل حصول کے لیے ان کی جائز جدوجہد کے لیے اپنی مضبوط اور غیر متزلزل حمایت کا اعادہ کرتا ہے۔
ترجمان نے کہا پاکستان اقوام متحدہ اور او آئی سی کی متعلقہ قراردادوں کے مطابق، 1967 سے پہلے کی سرحدوں خود مختار فلسطینی ریاست کے لیے اپنے مطالبے کی تجدید کرتے ہیں۔
تبصرے بند ہیں.