اسلام آباد: وفاقی دارالحکومت اسلام آباد کے ہائیکنگ ٹریک ٹریل 3 کے جنگل میں خاتون مبینہ زیادتی کا نشانہ بن گئی ، مقدمہ کوہسار تھانے میں درج کرلیا گیا۔
ایف آئی آر کے مطابق خاتون سےمبینہ زیادتی کا واقعہ 13 جولائی کو پیش آیا اور واقعےکے بعد مقدمہ خاتون کی ہی اگلے دن مدعیت میں درج کیا گیا۔
زیادتی کا نشانہ بننے والی خاتون ( س)مرید کے شیخوپورہ کی رہائشی ہے جسے نعمان نامی شخص نے نوکری کا جھانسہ دے کرراولپنڈی بلایا۔
ایف آئی آر میں میں کہا گیا ہے کہ نعمان سے ایک ایس ایم ایس پر رابطہ ہوا تھا میں نوکری کی تلاش میں تھی اور اس نے بتایا کہ وہ محکمہ تعلیم میں ہے مجھے ملازمت دلوا سکتاہے۔
نعمان سے فون پر بات ہونے کے بعد میں ٹنچ بھاٹہ راولپنڈی پہنچی جہاں نعمان نے مجھ سے 30 ہزار وصول کئے اور 20 ہزار نوکری کا نوٹیفکیشن ہوجانے کے بعد دینے کا کہا گیا۔
ایف آئی آر کے مطابق نعمان نے خاتون کو ٹینچ بھاٹہ سے ساتھ لیا اور انٹرویو کے بہانے اسلام آباد لے آیا اور پھر ٹریل تھری پر لے گیا جہاں گن پوائنٹ پر زیادتی کا نشانہ بنایا۔
ملزم نے خاتون کو بعد میں واپس راولپنڈی اسی جگہ ڈراپ کیا جہاں سے پک کیا تھا جب کہ خاتون نے اپنی ایک عزیزہ کو روداد سنائی جس کے مشورے پر مقدمہ درج کرایا ہے۔
زیادتی کے واقعہ کے بعد محکمہ وائلڈ لائف کا کہنا ہے کہ ٹریل تھری پر خاتون سے مبینہ زیادتی کے کیس کی تحقیقات مقامی پولیس کر رہی ہیں۔
واقعہ کے حوالے سے جاری بیان میں حکام کا کہنا ہے کہ وائلڈ لائف مقامی پولیس کو تفتیش میں مکمل معاونت فراہم کرتا ہے۔
تبصرے بند ہیں.