راولپنڈی: آرمی چیف جنرل عاصم منیر کی صدارت میں 258 ویں کور کمانڈرز کانفرنس، آرمی چیف جنرل سیّد عاصم منیر نے کہا ہے کہ ہمیں اپنی قومی سلامتی کو لاحق کسی بھی خطرے سے نمٹنے کے لیے ہمیشہ تیار رہنا چاہیے۔
آئی ایس پی آر سے جاری اعلامیہ کے مطابق فورم نے دہشت گردی کے خطرے کے خلاف مادر وطن کے دفاع میں بہادر سپاہیوں کی مسلسل قربانیوں کو زبردست خراج عقیدت پیش کیا۔
اعلامیہ کے مطابق شرکاء کو داخلی سلامتی کی موجودہ صورتحال کے بارے میں تفصیل سے آگاہ کیا گیا۔
آئی ایس پی آر کے مطابق کالعدم تحریک طالبان پاکستان اوراس کے دیگر گروہوں کو ہمسایہ ملک میں محفوظ پناہ گاہوں ،آزادانہ کارروائیوں،اور جدید ترین ہتھیاروں کی دستیابی کو پاکستان کی سلامتی کو متاثر کرنے والی بڑی وجوہات کے طور پرنوٹ کیا گیا۔
آئی ایس پی آر کے مطابق فورم میں فوج کی آپریشنل تیاریوں اور تربیتی پہلوؤں پر تفصیل سے غور کیا گیا۔
جنرل سیّد عاصم منیر نے کہا کہ معروضی تربیت ہماری پیشہ ورانہ مہارت کا خاصہ ہے اور ہمیں اپنی قومی سلامتی کو لاحق کسی بھی خطرے سے نمٹنے کے لیے ہمیشہ تیار رہنا چاہیے۔
آئی ایس پی آر کے مطابق فورم کو حکومت کے اقتصادی بحالی کے منصوبے اور خصوصی سرمایہ کاری سہولت کونسل (SIFC) کے دائرہ کار میں زراعت، آئی ٹی، کان کنی اور معدنیات اور دفاعی پیداوار کے شعبوں میں فوج کے کردار کے بارے میں بھی آگاہ کیا گیا۔
کورکمانڈرزشرکاء نے عزم کا اظہار کیا کہ حکومت پاکستان کی جانب سے معیشت کی بحالی کے لیے منصوبہ بند حکمت عملی کے اقدامات کی مکمل حمایت کریں گے اور پاکستانی عوام کی مجموعی بھلائی کے لیے ہر ممکن تکنیکی اور انتظامی تعاون فراہم کریں گے۔
تبصرے بند ہیں.