فوٹو: جنگ فائل
لاہور: ہوٹل سے بھتہ مانگنے والا ایس ایچ او رنگے ہاتھوں گرفتار ی کے بعد لاک اپ میں بند، ،پولیس پارٹی نے معاونت کرنےوالے ساتھی افسر کو بھی حراست میں لے لیا۔
بھتہ مانگنے کا واقعہ لاہور کا ہے جہاں سول لائن تھانے کے ایس ایچ او اور ساتھی افسر کو ہوٹل سے بھتا وصول کرنے کے الزام میں رنگے ہاتھوں گرفتار کر کے اپنے ہی تھانے میں قید کردیا گیا۔
ڈپٹی انسپیکٹر جنرل پولیس آپریشن لاہور علی ناصر رضوی کو برطانیہ میں مقیم ایک شہری نے شکایت کی تھی کہ لاہور میں لارنس روڈ پر واقع ان کے ہوٹل سے سول لائن تھانے کے ایس ایچ او اور ایک سب انسپکٹر ماہانہ بھتا طلب کر رہے ہیں۔
شکایت پر ڈی آئی جی آپریشن نے سخت کارروائی کی ہدایت کی جس پر ہوٹل منیجر نے ایس ایس پی آپریشن لاہور سہیل اشرف سے رابطہ کیا۔
بتایا گیاہے کہ ہوٹل کے منیجر محمد مشتاق کے مطابق 17 جولائی کو سول لائن تھانے کے سب انسپیکٹر اختر حسین سادہ کپڑوں میں ان کے پاس ہوٹل آئے اور مختصر دورانیے کے لیے کمرہ بک کرنے کا کہا اور من مرضی کے پیسے دینے کی آفر کی۔
منیجر کے مطابق انہوں نے انکار کیا اور بتایا کہ ہوٹل صرف فیملیز اور مسافروں کے لیے ہے جس پر اختر حسین نے خود کو پولیس افسر ظاہر کیا اور بتایا کہ وہ ایس ایچ او کے لیے کمرہ بک کرنا چاہتے ہیں۔
منیجر محمد مشتاق کے مطابق اس پر اختر حسین نے کہا کہ انہیں ایس ایچ او ندیم شیخ نے بلوایا ہے۔ سب انسپیکٹر انہیں گنگا رام اسپتال کی پولیس چوکی پر لے گیا۔
ایس ایچ او نے انہیں کہا کہ آپ ہوٹل میں غلط کاری کرتے ہو لہٰذا مجھے 70 ہزار روپے ماہانہ دیں بصورت دیگر آپ کے ہوٹل پر چھاپا مار کر کاروبار بند کر دوں گا اور اگر کوئی وقوعہ ہوا تو اس کا پرچہ بھی آپ کے ہوٹل پر درج کروں گا۔
امجد حسین کے مطابق انہوں نے بتایا کہ وہ آرمی سے ریٹائرڈ آفیسر ہیں اور ہوٹل کے مالک بھی پڑھے لکھے اور اچھے خاندان سے تعلق رکھتے ہیں، ہوٹل پر کبھی کوئی غلط کام نہ ہوا اور نہ ہوتا ہے جس پر ایس ایچ او نے انہیں ڈرایا دھمکایا اور صاف کہا کہ ہوٹل چلانا ہے تو ماہانہ بھتا دینا پڑے گا۔
میڈیا رپورٹ میں پولیس حکام کے حوالے سے بتایا گیاہے کہ اس سلسلے میں اختر حسین سے تحریری درخواست وصول کی گئی اور ایس ایس پی آپریشن سہیل اشرف نے منصوبہ بندی کی۔
پولیس حکام کے مطابق اس سلسلے میں اعلیٰ افسران کی نگرانی میں خصوصی ٹیمیں تشکیل دی گئی تھیں۔ منصوبہ بندی کے تحت محمد مشتاق رقم لے کر اختر حسین کے پاس پہنچے جو انہیں لے کر ایس ایچ او ندیم شیخ کے پاس گئے۔
محمد مشتاق نے جونہی رقم ایس ایچ او شیخ ندیم کو دی تو ایس پی سول لائن حسن جاوید بھٹی کی نگرانی میں پولیس پارٹی موقع پر پہنچ گئی۔
صرف چھاپہ ہی نہیں مارا بلکہ اس تمام کارروائی کی فلم بندی بھی کی گئی۔ نشان زدہ نوٹ برآمد کر کے ایس ایچ او ندیم شیخ اور سب انسپیکٹر اختر حسین کے خلاف ہوٹل منیجر محمد مشتاق کی مدعیت میں ایف آئی آر نمبر 1055/23 تعزیرات پاکستان کی دفعات 384 اور 155 کے تحت درج کر لی گئی۔
مقدمے کے تحت دونوں ملزمان کو گرفتار کر کے لاک اپ بھی کر دیا گیا۔ ایس ایچ او اور اس کے ساتھی پولیس افسر کے خلاف انتہائی سخت محکمانہ کارروائی بھی کی جا رہی ہے۔
تبصرے بند ہیں.