کراچی: پڑھائی کے دوران موبائل فون استعمال سے کارگردگی و صلاحیت متاثر ہوتی ہے، اقوام متحدہ کے ادارے کی رپورٹ میں دوران تعلیم موبائل فون استعمال کرنے سے خبردار کیا ہے.
اس حوالے سے برطانوی نشریاتی ادارے بی بی سی کی رپورٹ میں اقوام متحدہ کی تعلیمی، ثقافتی اور سائنسی ایجنسی یونیسکو نےکہا کہ شواہد موجود ہیں کہ موبائل فون کا زیادہ استعمال تعلیمی کارکردگی میں کمی سے منسلک ہے.
اسکرین پرزیادہ وقت گزارنے سے بچوں کے جذباتی استحکام پرمنفی اثرات مرتب ہوتے ہیں، رپورٹ میں بتایا گیا کہ دنیا میں ہر 4 میں سے ایک ملک ایسا ہے جہاں اسکولوں میں موبائل فون پر پابندی کے قوانین یا پالیسیاں موجود ہیں۔
رپورٹ کے مطابق برطانیہ میں اساتذہ فون کے استعمال کے حوالے سے قوانین طے کرتے ہیں لیکن زیادہ تر اسکولوں میں اس پر پابندی ہے.
2023 کی گلوبل ایجوکیشن مانیٹر رپورٹ کے مصنف مانوس انتونینیس نے بی بی سی کو بتایا کہ ان کی تحقیق میں اسکول میں اسمارٹ فون کے استعمال کی ایسی مثالیں ملتی ہیں جو طلبہ کی سیکھنے کی صلاحیت میں کمی پیدا کررہی ہے اور ان کے پرائیویسی کے خطرے میں بھی اضافہ کررہی ہے۔
ڈان نیوز نے ان کے حوالے سے رپورٹ کیا ہے کہ صرف ایسی ٹیکنالوجی جو سیکھنے کے عمل میں مدد دیتی ہے وہی اسکولوں میں لائی جاسکتی ہے۔
مانوس انتونینیس نے بتایا کہ طلبہ کو تعلیم کے حوالے سے ٹیکنالوجی کے استعمال سے مکمل طور پر دور نہیں رکھا جانا چاہیے لیکن ممالک کو اس بارے میں بہتر رہنمائی دینے کی ضرورت ہے کہ اسکول میں کس قسم کی ٹیکنالوجی اپنانے کی اجازت ہونی چاہیے۔
رپورٹ میں کہا گیا ہے کہ متعدد مطالعات سے پتہ چلتا ہے کہ اسکولوں میں موبائل فون پر پابندی لگانے سے تعلیمی کارکردگی بہتر ہوتی ہے۔
16 سالہ لیکسی نے بتایا کہ ان کی سابقہ ہیڈ ٹیچر نے اسکول میں تعلیمی مدد حاصل کرنے کے لیے فون لانے کی اجازت دی تھی، اکثر طالب علم اسے سوشل میڈیا کے لیے استعمال کرتے ہیں۔
رپورٹ کے مطابق 2021 میں برطانیہ کے اُس وقت کے ایجوکیشن سکریٹری گیون ولیمسن نے کے اسکولوں میں موبائل فون پر پابندی لگانے کا مطالبہ کیا تھا، لیکن موجودہ محکمہ برائے تعلیم کا کہنا ہے کہ یہ اساتذہ پر منحصر ہے کہ وہ فیصلہ کریں کہ آیا اسکول میں کلاسز کے دوران موبائل فون استعمال کیے جا سکتے ہیں یانہیں۔
تبصرے بند ہیں.