فوٹو: سوشل میڈیا
کرم :خیبرپختونخوا کے ضلع کرم میں دوقبائل کے درمیان جنگ بندی کےلئے آنے والے سرکاری قافلے پر فائرنگ کردی گئی، اسسٹنٹ کمشنر کرم سمیت تین پولیس اہل کار زخمی ہوگئے۔
میڈیا رپورٹس میں پولیس کے حوالے سے بتایا گیاہے کہ ایس ایچ او کے مطابق اپر کرم میں ضلعی انتظامیہ نے جنگ بندی کروا دی تھی لیکن دوسرے فریق سے بات چیت کے لیے جانے والے قافلے پر فائرنگ کی گئی۔
فائرنگ میں سرکاری قافلے کی قیادت کرنے والے اسسٹنٹ کمشنر کرم منان زخمی ہوگئے،جنھیں زخمی حالت میں نوشہرہ اسپتال منتقل کردیا گیاہے۔
غلجو کلے کے ساتھ اسسٹنٹ کمشنر امن و امان قائم کرنے کے لیے بوشہرہ جا رہے تھے جس پر فتح کلے کی طرف سے فائرنگ کی گئی۔
پولیس کے مطابق اسسٹنٹ کمشنر کے ساتھ ساتھ فائرنگ میں 3 اہل کار بھی زخمی ہوئے ہیں جب کہ زخمی اسسٹنٹ کمشنر ریونیو سعید منان کو آپریشن تھیٹر منتقل کردیا گیا۔
فائرنگ کے حوالے سے قبائلی رہنما شفیق مطہری نے بتایا ہے کہ ہم انتظامیہ و پولیس کے ہمراہ فائر بندی میں مصروف تھے کہ فائرنگ ہوئی اور فائرنگ کا واقعہ بوشہرہ میں جمعہ کی صبح پیش آیا۔
کرم کی ضلعی انتظامیہ کرم کا کہنا ہے کہ علاقے میں سیکیورٹی صورتحال کے پیش نظر حفاظتی انتظامات کیے جا رہے ہیں جب کہ دوسری جانب کوہاٹ میں کمشنر آفس میں جرگہ جاری ہے۔
تبصرے بند ہیں.