فوٹو : فائل
اسلام آباد : قذافی اسٹیڈیم کی لائٹس پر پراپیگنڈا کرنے والے بھارت میں انگلینڈ کیخلاف میچ میں 35 منٹس لائٹس بند، میچ رکا رہا، یہ واقعہ گزشتہ روز بھارتی شہر کٹک کے باراباتی اسٹیڈیم میں بھارت اور انگلینڈ کے درمیان جاری دوسرے ون ڈے میچ کے دوران پیش آیا.
بھارت اور انگلینڈ کے دوسرے ون ڈے میچ کے دوران دوسری اننگز کے ساتویں اوور میں فلڈ لائٹس کی خرابی کے باعث کھیل کو 35 منٹ تک روکنا پڑا، جو بھارتی کرکٹ بورڈ کیلئے شرمندگی کا باعث بن گیا۔
مہمان ٹیم انگلینڈ کی جانب سے 305 رنز کے ہدف کے تعاقب میں بھارتی ٹیم کی بیٹنگ جاری تھی کہ ساتویں اوور میں کلاک ٹاور کے قریب لگی ایک فلڈ لائٹ نے مزید جلنے سے جواب دے دیا.
میدان میں روشنی کم ہو جانے کی وجہ سے کھلاڑیوں کو میدان چھوڑنا پڑا، بھارتی میڈیا کے مطابق میچ میں یہ مسئلہ پہلی بار شام سوا 6 بجے سامنے آیا جب کچھ فلڈ لائٹس لمحہ بھر کے لیے بند ہو گئیں.
جیسے ہی انگلش پیسر ثاقب محمود نے روہت شرما کو گیند کروانے کی تیاری کی تو بجلی بحال ہوگئی اور کچھ ہی لمحوں بعد روشنی مکمل طور پر گل ہوگئی جس سے کھلاڑی مایوس ہوگئے اور امپائرز نے فوری طور پر کھیل روک دیا۔
شائقین کی جانب سے ردعمل اور بدنظمی بھی دیکھنے میں آئی اور ان کے بےقابو ہونے پر اسٹیڈیم کے دروازوں پر موجود پولیس کو لاٹھی چارج کرنا پڑا۔
فلڈ لائٹس کی خرابی پر منتظمین کی جانب سے جاری کیے گئے بیان میں کہا گیا کہ فلڈ لائٹس کے ساتھ منسلک جنریٹر میں خرابی پیدا ہو گئی تھی، جس کی وجہ سے کلاک ٹاور کے پیچھے والے مخصوص اسٹینڈ کی لائٹس بند ہو گئیں۔
وضاحت میں انتظامیہ کی جانب سے کہا گیا کہ ہم نے بیک اپ جنریٹر کو آن کیا لیکن ایک جنریٹر سے دوسرے جنریٹر میں کنکشن منتقل کرنے میں وقت لگا، جس کی وجہ سے تاخیر ہوئی۔
واضح رہے کہ دو دن پہلے 8 فروری کو قذافی اسٹیڈیم لاہور میں پاکستان کے خلاف میچ میں گیند کا درست اندازہ نہ لگانے پر گیند کیوی فیلڈر رچن رویندرا کے ماتھے پر لگی اور وہ زخمی ہوئے.
بھارتی میڈیا نے یہ حادثہ قذافی اسٹیڈیم کی لائٹس سے جوڑ کر پراپیگنڈا کرنا شروع کردیا اور اس پر بعض انڈین چینلز نے ٹاک شوز کر ڈالے مگر اپنے ملک میں جب میچ لائٹس بند ہونے سے میچ 35 منٹس رکا تو سب کو سبکی کا سامنا کرنا پڑا.
تبصرے بند ہیں.