فوٹو : فوٹو
اسلام آباد : اپوزیشن اتحاد عمران خان سے ملاقات نہ کرانے پر سلامتی کمیٹی اجلاس میں شریک نہ ہوا، تحریک انصاف نے قومی سلامتی کی پارلیمانی کمیٹی کے اجلاس میں شرکت کے لیے بانی پی ٹی آئی کی پیرول پر رہائی یا ملاقات کرانے کا مطالبہ کیا تھا۔
پاکستان تحریک انصاف اور اپوزیشن رہنماؤں نے اسلام آباد میں پریس کانفرنس کرتے ہوئے عمران خان سے مشاورت تک قومی سلامتی کمیٹی کے اجلاس میں شرکت نہ کرنے کا اعلان کیا۔
تحریک تحفظ آئین پاکستان کی مرکزی قیادت نے پارلیمنٹ کا جوائنٹ سیشن بلانے کا مطالبہ بھی کیا، رہنماوں کا کہنا تھا عمران خان ملک کی سب سے بڑی جماعت کے مقبول ترین لیڈر ہیں ان کے بغیر فیصلے قبول نہیں کریں گے.
پی ٹی آئی کے سیکرٹری جنرل سلمان اکرم راجہ نے کہا کہ ہم اس وقت کسی بھی آپریشن کے حق میں نہیں ہیں جب کہ قومی اسمبلی میں اپوزیشن لیڈر عمر ایوب نے کہا کہ بانی پی ٹی آئی کی مشاورت کے بغیر پارٹی کوئی بھی فیصلہ کیسے کرسکتی ہے؟
دوسری طرف قومی سلامتی کی پارلیمانی کمیٹی کا اجلاس ہوا ہے ، وزیراعظم، آرمی چیف سمیت اہم سیاسی و عسکری قیادت اور مولانا فضل الرحمان بھی شریک ہوئے.
اپوزیشن اتحاد کے سربراہ سربراہ محمود خان اچکزئی نے کہا کہ بانی پی ٹی آئی کے بغیر کسی میٹنگ کی اہمیت نہیں ہوگی، ہم اس غیر آئینی وزیراعظم کی دعوت پر کیسے جائیں؟
انہوں نے مزید کہا کہ عمران خان سے ملنے پارٹی رہنما جاتے ہیں تو اجازت نہیں ملتی، یا تو اعلان کردیاجائے کہ بانی پی ٹی آئی خطرناک آدمی ہیں، اُن سےکوئی نہیں مل سکتا، جیل سپرنٹنڈنٹ اورحکام کو اس کا حساب دینا ہوگا۔
اس موقع پر راجہ ناصر عباس نے کہا کہ بانی پی ٹی آئی کوآن بورڈ لیے بغیر جو فیصلے ہوئے، عوام ان کو قبول نہیں کریں گے، عمران خان کے ساتھ عوام ہیں۔
تبصرے بند ہیں.