فوٹو : فائل
اسلام آباد : قومی سلامتی کمیٹی اجلاس میں شریک نہ ہونے والے لیگی رہنما نوازشریف کی بلوچستان مسائل پررائے سامنے آئی ہے جس میں سابق وزیراعظم نے کہا ہے کہ بلوچستان کے مسائل کا حل صرف اور صرف جمہوری طریقے سے ممکن ہے۔
گزشتہ روز مسلم لیگ ن کے قائد نواز شریف سے وفاقی وزیر قانون اعظم نذیر تارڑ، صدر سپریم کورٹ بارایسوسی ایشن میاں محمد رؤف عطا اور صدربلوچستان ہائیکورٹ بارنے ملاقات کی۔
ملاقات میں میاں رؤف عطا نے نوازشریف سے درخواست کی کہ سیاسی قائدین اور بلوچستان کے رہنماؤں کو ایک پلیٹ فارم پراکٹھا کریں۔
ملاقات کے بعد جاری ہونے والے اعلامیہ میں کہا گیا ہے کہ تمام رہنماؤں کو اکٹھا کرنے سے صوبے کے مسائل کےحل پرقومی اتفاق رائے قائم کیا جاسکے گا۔
نوازشریف نے بلوچستان کی موجودہ صورتحال پر دکھ اور تشویش کا اظہار کیا اور انہوں نے ہر ممکن اقدامات کرنے اور امن کی بحالی کے لیے کردار ادا کرنے کا اعلان کیا۔
نوازشریف نے جلد بلوچستان کا دورہ کرنے کا بھی اعلان کیا اور کہاکہ صوبے کے مسائل کا حل صرف اور صرف جمہوری طریقے سے ممکن ہے۔
سابق وزیراعظم نے بلوچستان کے مسائل کے حل کےلیے وفاقی حکومت کی کوششوں کی مکمل حمایت کا اعادہ کیا اور دونوں رہنماؤں نے پرامن، خوشحال، ترقی یافتہ بلوچستان اورملکی بہتری کےلیے مستقبل میں مشاورت جاری رکھنے کا عزم کیا.
تبصرے بند ہیں.