فوٹو : فائل
اسلام آباد : ایران پاکستانیوں کے قاتل پکڑ کر انھیں قرار واقعی سزا دے، وزیراعظم شہبازشریف نے ایرانی حکومت سے یہ مطالبہ کرتے ہوئے کہا کہ اس بہیمانہ اقدام کی وجوہات عوام کے سامنے لائے۔
وزیرِاعظم محمد شہباز شریف نے ایران کے صوبہ سیستان کے علاقے مہرستان میں 8 پاکستانیوں کے بیہمانہ قتل پر گہرے دکھ اور رنج کا اظہار کیا ہے۔
انہوں نے ایرانی سرزمین پر پاکستانیوں کے قتل پر گہری تشویش کا اظہار کرتے ہوئے کہا کہ دہشت گردی کا ناسور خطے میں موجود تمام ملک کے لیے تباہ کن ہے۔ خطے میں موجود ممالک کو مل کر دہشت گردی کے خلاف مربوط حکمت عملی پر عمل درآمد کرنا ہوگا۔
وزیرِ اعظم نے وزارت خارجہ کو پاکستانیوں کے اہل خانہ سے رابطہ کرنے اور ایران میں پاکستانی سفارتخانے کو انکی میتوں کی باحفاظت واپسی کیلئے اقدامات کی ہدایت کی ہے۔
یاد رہے گزشتہ روز ایران کے مشرقی صوبے سیستان بلوچستان میں ایک مسلح حملے میں کم از کم 8 پاکستانی شہری جاں بحق ہوگئے۔ واقعہ پاک-ایران بارڈر کے قریب ایرانی سیستان بلوچستان صوبے میں پیش آیا۔
یہ پاکستانی موٹر مکینک تھے اور ان پاکستانیوں کا تعلق پنجاب کے شہر بہاولپور سے تھا، انہیں ایک ورکشاپ میں ہاتھ پیر باندھنے کے بعد فائرنگ کرکے قتل کیاگیا۔
تبصرے بند ہیں.